Dialog

1. Wangenan Dialog

        Numutkeun élmu komunikasi, dialog (dialogika) dina Haerudin, Suherman (2013) nya éta élmu ngeunaan rupa-rupa kagiatan nyaritanu dilakukeun ku papada jalma. Dialog bisa ogé mangrupa karya tulis nu dipidangkeun dina wangun paguneman antara dua tokoh atawa leuwih.

        Sacara étimologi kecap dialog diwangun ku dua kecap nu asalna tina basa Yunani (Haerudin, Suherman 2013), nya éta die (dia) nu hartina jalan baku; cara jeung logos nu hartina kecap. Jadi dialog téh ngandung harti kumaha carana jalma ngagunakeun kecap.

        Tujuan dialog nya éta pikeun ngébréhkeun kateulogisan atawa hal-hal nu teu kahontal ku pikiran pribadi. Jadi kucara dialog bisa ngawangun hiji pamikiran koléktif nu diwangun ku cara babarengan kalawan hasilna original jeung kreatif. Prosés dialog nya éta prosés numuwuhkeun hiji kasadaran mkir koléktif.

2. Prinsip-prinsip Dialog

Prinsip dina dialog anu mérénah pisan upama dipaké dina kagiatan dialog, prinsip dialog sacara umum nya éta:

a.    Aya masalah anu jadi bahan padungdengan.

b.    Silih tukeur informasi jeung pamikiran dina wilayah pangalaman nu béda.

c.    Masing-masing jalma nu kalibet bisa nepikeun jeung narima pamadegan.

d.   Nyiptakeun hubungan harmonis sarta ngupayakeun lajuning laku tina hasil nu geus jadi kamupakatan.

e.    Leuwih ngutamakéun mikir rasional tinimbang émosional.

3. Unsur-unsur nu Ngawangun Proses Dialog

Dina ngawangun proses dialog panyatur kudu bisa méré reaksi ka paregep. Reaksi paregep bisa mangrupa pangrojong, pamadegan, komentar, saran, koréksi, jeung sajabana. Unsur-unsur dina ngawangun proses dialog numutkeun Powers dina Tarigan dina Haérudin jeung Suherman (2013) ngawengku kaparigelan sosial, kaparigelan semantik, kaparigelan fonetik, jeung kaparigelan vokal.

a. Kaparigelan sosial patalina jeung panyatur kudu ngébréhkeun naon waé, kumaha cara panyatur nepikeun, iraha nepikeunana jeung di mana nepikeunana.

b. Kaparigelan semantik patalina jeung kamampuh ogé kadewasaan panyatur, nya éta kumaha nepikeun eusi haté, gagasan katut sikep dina milih kekecapan sangakan bisa kaharti kunu ngaregepkeun.

c. Kaparigelan fonemik patalina jeung kumaha carana ngawangun unsur-unsur fonemis kalawan mérénah.

d. Kaparigelan vocal patalina jeung kamampuh nyiptakeun pangaruh tina émosi diri nu diébréhkeun ku luhur handapna sora, lentong, buleud, gentem, jeung bédas launna sora.

4. Rupa-rupa Wangun Dialog

Rupa-rupa dialog nu kungsi dipikanyaho ku urang di antarana diskusi panel, brainstorming, debat, simposium, kolokium, fishbowl, sidang, buzz group, policy making group, jeung roll play. Istilah-istilah diluhur bisa dipaké pikeun kagiatan diajar ngajar anu ilaharna disebut model pangajaran kooperatif. 

RÉFÉRÉNSI

Haérudin jeung Suherman, (2013). Panganteur Kaparigelan Nyarita. Bandung: Jurusan Pendidikan Bahasa Daerah Fakultas Pendidikan Bahasa dan Sastra UPI