Rétorika Jeung Komunikasi

Rétorika mangrupa hiji prosés komunikasi anu dinamis lantaran geus jadi pangabutuh dina kahirupan sapopoé. Pikeun ngalaksanakeun komunikasi, manusa ngagunakeun basa salaku média. Kajian rétorika teu ngan saukur dilaksanakeun sacara lisan,  tapi ogé aya dina kagiatan non lisan (tulis). Boh dina komunikasi lisan atawa non lisan (tulisan), hakékat rétorika mangrupa prosés komunikasi anu miboga sistem (sistematis). Anu dimaksud sistem nya éta hiji beungkeutan nu ngandung sajumlah komponén, sarta masing-masing komponén ngabogaan peran jeung fungsi anu tangtu tur nepika ngawangun hiji organisasi nu éféktif pikeun ngahontal tujuan.

Komponén prosés rétoris nya éta: 1) panutur (panyatur / panulis), 2) pesen komunikasi, 3) saluran, 4) alam semesta, 5) paregep atawa pamiarsa. Disagédéngeun komponén tadi, rétorika ngabogaan sajumlahing substansi nya éta: 1) daya nalar nu hadé, 2) matéri prémis, 3) basa, jeung 4) étika. Éta sakabéhna silih ngarojong kana proses komunikasi.

Dina lumangsungna prosés rétorika dimimitian ku aksi si panutur nu boga maksud ngalakukeun komunikasi ka paregep. Sangkan kalaksanakeun, panutur kudu ngawasa sababaraha substansi rétorika nya éta:

1). Panalaran anu hadé, maksudna sangkan bisa nyusun matéri nu rék dipidangkeun katut milih jeung nyusun argument;

2). Sajumlahing matéri nu bakal digunakeun dina nepikeun pesen-pesen;

3). Basa jeung sagala aspékna nu digunakeun salaku wadah pikeun midangkeun matéri, ide, argument, jeung sajabana dina prosés encoding;

4). Étika nu bakal ngatur sakur perilakuna dina prosés rétoris.

   Ku ngawasana substansi rétorika nu sumebarna di alam semesta, panutur nangtukeun pesen-pesen nu bakal ditepikeun dina komunikasi ngaliwatan prosés rétoris. Dina éta pesen ngandung téma utama anu ngawarnaan jeung ngadadasaran kana sakabéh komunikasi.  Wujud na bisa mangrupa ide, pamadegan, karep, kahayang, perasaan, jeung informasi.

RÉFÉRÉNSI

Haérudin jeung Suherman, (2013). Panganteur Kaparigelan Nyarita. Bandung: Jurusan Pendidikan Bahasa Daerah Fakultas Pendidikan Bahasa dan Sastra UPI