Monolog

            Monolog nya éta nyarita saarah nu dilakukeun ku saurang panyatur. Biantara, ceramah, hutbah, orasi, ngadongéng, maca puisi atawa deklamasi, maca carpon kaasup kana kagiatan monolog. 

Monolog asalna tina kecap mono nu hartina hiji jeung log/logi/logos nu hartina élmu. Sedangkeun kecap monolog numutkeun M. Echol jeung Hassan Sadily dina Kamus Inggris-Indonesia (385:1988) miboga harti nyarita sorangan. Upama dipatalikeun jeung kajian élmu terapan nu ngajarkeun ngeunaan seni nyarita, monolog ngandung harti kagiatan nyarita pikeun nepikeun kereteg haté , maksud, atawa informasi ti saurang jalma ka jalma séjén. Dina kahirupan sapopoé, utamana dina widang seni tutur atawa seni sastra, kecap monolog biasana dipaké pikeun kagiatan seni peran jeung téater.

           Charlie Caplin mangrupa salahsahiji tokoh nu ngagagas monolog. Istilah monolog mimiti diwanohkeun kira-kira taun 60-an di Hollywood nu mekar jadi sarana seni jeung téater. Lian ti éta, monolog sok aya dina pintonan film-film komédi, horror jeung sajabana. Monolog dina seni adegan kayaning drama atawa sandiwara tunggal biasana midangkeun paguneman ku saurang palaku tunggal anu sok disebut sandiwara tunggal. Monolog dina seni sastra upamana dina dongéng, carpon, atawa sajak diwangun ku kecap atawa omongan nu diébréhkeun pikeun ngagambarkeun kaayaan nu karandapan saurang tokoh, boh dirina boh jalma séjén.

RÉFÉRÉNSI

Haérudin jeung Suherman, (2013). Panganteur Kaparigelan Nyarita. Bandung: Jurusan Pendidikan Bahasa Daerah Fakultas Pendidikan Bahasa dan Sastra UPI